S Stäggeladärnli

23. März 2013 | Von | Kategorie: Hyylgschichte

Rubrikenbild HyylgschichteEm Baschi sy Babbe isch e Fasnächtler mit Härz und Seel. Sit vielne Joor isch är Aggtivmitglied binere grosse Stammclique. Aer isch au langi Joor im Vorstand gsi, hett scho d Sujetkommission gleitet und nimmt jetzt in dr alte Garde vieli Uffgobe wohr. Kurzum wenn meh Hilf brucht, uff e Babbe vom Baschi kame zelle.

So hetts dr eint oder ander nit verwunderet, as dr Baschi amene Fasnachtsmäntig uff d Wält cho isch. Es isch zwor nit uff e Vierischlag gsi, aber dr Cortége hett grad so richtig aagfange. So isch em Baschi si Babbe im Gossdym uff dr Geburtstation vom Kantonsspital gstande und hett e riese Freud kha, as es e Bueb worde-n-isch, do dr Babbe vom Baschi in ere Männerclique drummlet hett. Vor em geischtig Aug hett är dr Baschi scho als zuekünftige Drummelkeenig gseh.

Laider hänn sich d Wulgge am Himmel vo däm junge Gligg ziemlig schnäll verdungglet. D Geburt vom Baschi hett d Mamme vonem rächt mitgnoh. Sie hett tapfer kämpft, dr Kampf jedoch am Donnschtig morge verlore und dr Dood hett sie kurz nach em Aendstraich mit sich gnoh und em lieb Gott ybergäh.

Em Baschi si Babbe isch wiederum im Kantonsspital gstande, im gliiche Gossdym wie am Mäntig, dasmol aber ellai uff eme lange Spitalgang, belüchtet vo-n-e paar kalte Neonröhre. Aer isch e paar Schritt gange und hett denn kenne dure grossi Schiibe sii Sohn und s Einzig wo ihm no bliibe-n-isch aaluege. Bim Aabligg vo däm schlofende Hämpfeli sinn ihm e paar Drääne uffs Gossdym kulleret.

Aer hetts Kantonsspital verloo und isch durch die kalti Nacht, verbii an de orangekleidete Putzequipe, langsam heimegloffe. Uff dr mittlere Brugg hett är sich e kurze Momänt yberlegt in Rhy z springe, hett dä Gedangge jedoch grad wieder verworfe.

S Läbe hett miesse witergoh. Au wenn sich in dere Nacht einiges grundlegend veränderet hett fyr die zwei. Irgendwie hänn sie sich kenne organisiere, dr Baschi e bitz weniger, dr Babbe drfyr umso mehr.

Die näggscht Fasnacht isch scho bald wieder aagstande. Am Sunntig vor em Morgestraich sinn dr Baschi, digg yypaggt im Kinderwage und si Babbe ans Grab vo dr Mamme gange und hänn e Maie Mimösli uff e Grabstei gleggt. Sie isch zwar nie die Fasnächtlere gsi, hett aber ihre Maa und sy Clique immer beschtmegliggscht unterstützt.

Do dr Babbe vom Baschi trotz däm Schicksalsschlag d Fasnacht nit hett welle uffgäh, hänn sich Fraue vo Cliquekollege um dr glai Baschi kümmeret, während si Babbe hett kenne an de scheenschte drey Dääg dailnäh. Es sinn fyr dr Babbe nit ganz aifachi Fasnachte gsi und alli Joor kurz vor em Aendstraich am Vieri demorge, sinn em d Drääne ko unter dr Larve.

Es isch dr Daag ko, wo dr Baschi knapp säggs gsi isch und dodrmit gross gnueg fyr sini erschte eigene Drummelschleegel. Dr Baschi hett sehr schnäll Fortschritt gmacht und so hett är mit siebe s erscht Mol kenne mit dr Junge Garde mitlaufe. S erscht Joor als Vorträbler und mit em Babbe zämme in d Stadt. Die zwai sinn an Träffpunkt kho und wo s drum gangen isch, wär welles Stäggeladärnli bikunnt hetts bim Baschi e riese Enttüschig gäh. Es hett fyr ihn kei Stäggeladärnli mehr kha. Dr Baschi hett fascht aafoo hüle, so enttüscht isch är gsi. Aer hett denn trotzdäm e scheene Morgestraich erläbt und bim Zmorgenässe hett ihm dr Babbe gseit, „Los Baschi, näggscht Joor hesch du di aige Stäggeladärnli. Ich wird Dir durchs Joor dure eins baue und au sälber moole“. Dr Baschi hett zwar trotzig gfunde, s näggscht Joor wurd är mitdrummle, aber bim Babbe isch die Idee gebore gsi und die hett är denn au durezoge. Dure Summer isch är immer wieder emol im Käller verschwunde um e Stäggeladärnli fyr si Sohn z zimmere. Aer hett e runds Ladärnli baut, hetts gspannt und vorne druff e Waggis und hinde druff en alti Dante gmolt. Nonem Laggiere hett är si Wärk zfriede betrachtet.

Dr Baschi jedoch hett mit sine Wort rächt sotte bhalte. Aer hett soviel giebt, as es ihm glänggt hett, an dr näggschte Fasnacht mitzdrummle. So isch das Stäggeladärnli vom Babbe unbenutzt im Käller unde bliibe. Einersits isch dr Babbe stolz gsi, dass dr Baschi scho drummlet, anderersits hetts en ebbe scho gfuxt, as si Ladärnli nit mit an Morgestraich gno worde-n-isch. Gsait hett är das jedoch nie öpperem.

So sinn d Joore vergange. Dr Baschi hett sogar emol s Offizielle Brysdrummle gwunne, so wie s dr Babbe vor sim geischtig Aug kha hett, domols bi dr Geburt vom Baschi. Im Saal isch dr Babbe, au nimm ganz dr Jüngscht, fascht platzt vor Stolz. Nodäm Babbe und Sohn zämme-n-im Stamm so mängi Fasnacht gmacht hänn und dr Babbe emol in die Alti Garde gwäggslet hett, isch dr Daag ko, wo eigentlich kein fyr meeglig ghalte hett. Em Babbe vom Baschi isch es vo Daag zu Daag schlächter gange.

Mit dr Zyt isch es em eso schlächt gange, as är ins Kantonsspital brocht worden isch. D Cliquekollege hänn zwor gseit, dr Babbe, dä macht das, e Fasnacht ohni ihn, das isch jo gar nit meeglig. Aber au die greeschte Optimischte in sinere Clique hänn miesse iigseh, as es wird e Fasnacht ohni dr Babbe vom Baschi sii, do sich si Zuestand au Aendi Januar nonig besseret hett.

Mitti Februar, öppe zwei Wuche vor em Morgestraich hett dr Babbe gmerkt, as dr Dood langsam vo ihm Bsitz ergrifft. Aer hett dr Baschi loh ko und hett en lang aagluegt. Denn seit är zu sim Sohn, „Los Baschi, ich ha Dir doch vor vielne Joor, wo du no e glaine Gnäggis gsi bisch, e Stäggeladärnli gmacht. Das Ladärnli stoht no immer unbenutzt im Käller unde und das hett mir jedesjoor am Morgestraich e Stich gäh. Sälber hanis nit welle mitnäh, do ichs fyr di baut ha. Ich weiss, as ich dä Morgestraich nimm wird erläbe, aber ich wird unser Ladärnli vo oobenabe kenne bewundere“. Oebbe zwei Stund speeter isch dr Babbe vom Baschi im Kreis vo sine Altgardischtefrynd friedlig iigschloofe.

Gli druffabe isch dr Morgestraich kho. Es isch e sehr spezielle Morgestraich gsi. E stärneklari, kalti Nacht. Die drei Lambbe sinn, mit eme schwarze Druurflor gschmückt, barat gstande um in dä einzigartigi Basler Morge z lüüchte. Die ganze Cliquemitglieder sinn still und in sich keert ummegstande, kein hett richtig gwisst, was sage. Vo wyyt här, hett mes Gröhle vo-n-e baar Jugendlige ghört. Uff eimol stoht dr Baschi do. Ohni Drummle, drfyr mit eme Stäggeladärnli, wo no keine vo dr Clique bishär gseh hett.

Es hänn sich e paar frogend aagluegt, es hett sich aber niemer traut, dr Baschi druff aazspräche. Am fünf vor Vieri isch dr Baschi wortlos bi de Vorträbler iigstande und hett s Liechtli vom Stäggeladärnli aazunde. Kurz vor em Vierischlag zieht är sii Larve aabe und wartet druff, as s Liecht abgoht. Denn isch es sowiit, dr Baschi hört dr Dambourmajor aasage, „Morgestraich, vorwärts, Marsch!“ und denn wirds dunggel um ihm umme. Während s hinter ihm aafoht drummle und pfyffe luegt är uffe zu sim Ladärnli und är hetts Gfühl, dass in däm Momänt ai Stärn am Basler Nachthimmel bsunders häll aafoht funggle.

Kommentare sind geschlossen