Aadie Fasnacht

21. Februar 2013 | Von | Kategorie: Hyylgschichte

Rubrikenbild Hyylgschichte

Jetzt isch si vorby, die Fasnacht. E Fasnacht wo mir e ganzes Johr druff gwartet und drfür gschafft händ. E ganzes Johr wird probt und güebt und doch isch si nach drei Dääg scho wider verby. Si hinterlosst e kalti graui Lugge – e Lugge, wie wenn e guete Fründ von is gange wär.

Uff em Heimwäg findsch no e paar vereinzelti Räppli am Stroosserand, und die erinnere di dra, dass es kai Draum isch gsi, sondern dass sie gläbbt hett, d Frau Fasnacht. S isch nooni lang vorby. Wenn de im Bett ligsch, höörsch si no, die Drummle und Pfyffe, die Guggekläng.

Deheime hängt s Goschtym am Bügel, es schmeggt no nach Rauch und verschüttetem Bier. Aber es hängt ebbe au no e fine Duft vom Fasnachtschätzeli dra und zaubert dir e Lächle uff s Gsicht.
Worum numme isch die Fasnacht nach drei Dääg scho wider vorby? E Zyt, wo de dörfsch e andere si, wo d Stadt e farbig Glayd a hett und alles ganz anders isch, aber doch so verdraut.

I ha e Drääne im Aug, wenn i zrugg dängg. Drey  Dääg voll neue Yydrügg und Gfühl. Neui Lüt hesch leere kenne, wo du vorhär no nie hesch gseh. Gli sin si aber zu Fründe gworde, wie wenn se scho s Läbe lang kenne wurdsch.
D Bängg hän di zum Lache aber au zum Nochdängge brocht. Gugge hän gspielt, Drummler mit de Pfyffer gässlet und e Waggis verdailt no si letschts Dääfeli. Im Schoofegg sinn mir alli binenand gstande und es isch glich gsi, wär de bisch und was de machsch. Au han y e Amerikaaner kenne gleert, als Tourischt isch är an die Fasnacht cho vor 15 Joor. Sytdämm isch är drby, als Waggis innere Basler Clique. Kai Fasnacht hett är ussgloh, ych kha ihn guet verstoh. So gits dausig Gschichte und alli sind einzigartig und doch irgendwie verdraut. Wenn di d Frau Fasnacht aaglächlet hett, bisch halt nümm dr glich.

Jetzt isch si verbyy, die Fasnacht. Die Lugge wiegt schwäär. Es goht no länger als e Johr, genau no 381 Dääg bis zur näggschte Fasnacht. E langi Zyt.

Ab morn bisch wider im Alltag drin und Fasnacht ruggt in Hintergrund. Aber nit für lang, gli muesch wieder afoo proobe. Sujet usdängge und umsetze – was wänn mir nur uuspiele? Der Waage brucht zwei neui Räder und s Kopfladärnli muesch au no fligge. Jo nai, wo nimmi numme die Zyt här? S isch doch gli widder Fasnacht!

Und das isch au guet esoo…

Kommentare sind geschlossen